الثلاثاء، 11 نوفمبر 2008

تأخرنا عن احتفالية الدستور

وصلنا متأخرين للاسف بسبب الظروف الطارئة


ديوم مو عاجبها وصولنا المتأخر
ما ارتاحت الا لمن ابصمت بصبعها الصغير :)



لووول
ناطرين التغطيــات :)
مع اعتذارنا على عدم التغطية بسبب وصولنا المتأخر

هناك 24 تعليقًا:

غير معرف يقول...

هذي بنتك؟:)

اسم الله عليها، الله يخليها لك

توقعتك عزوبي توه متخرج من الجامعة وناطر الوظيفة:)

ما حضرت الاحتفالية لاني بطبعي اكره التجمعات

Hamad Alderbas يقول...

عزيزي ام الهيماني

الله يخليك تسلم

ونستني لمن صغرتني

على كل انا بعدي صغير

ما سمعت اغنية صغيرون ترة تلبأ لي :)

الجو كان حلو فاتك لا تقمت على روحك اطلع غير جو , انا وصلت متاخر ولكن لحقت على بعض الاصدقاء الاعزاء والجو كان بديع عالبحر والعرضة ونستنا

تحية لك

Yang يقول...

الله يحفظلك ديوم :)

تغطيتنا راح تتأخر شوية, تعابه :(
بس ين تقول انها شافت ديوم :)


انفضحت :)

ZooZ "3grbgr" يقول...

الله يخليها لكم
ياحلووووووها
ماشاالله تبارك الرحمن
انا من كثر الحوسه ما شفتها
وانا كمان عندي تغطيه
:")

Mohammad Al-Yousifi يقول...

ماشاءالله بنتك وايد احلى منك

الله يخليها لك

مالك عذر على التأخير

nanonano يقول...

عيل للأسف أني ما طولت

الصج حسيت بخيبة أمل شويه..توقعت الأحتفاليه زفضل من جذي

بالبدايه بدوها بخطب قصيره
أحمد الصراف
د.سعاد المنيس
عبدالمحسن تقي
خالد الفضاله
عبيد المطيري (محامي بس متحدث أول مره أسمعه..شكله بيصير له مستقبل)
أحمد الشخص
كله مطقوق

ما أدري أذا نسيت أحد و لا لأ..بس علي ما خلصوا الا أنا مالّه
لأني أنسانه restless
و بعدين أغاني وطنيه

أنا عقبها مشيت

و بس من صوبي

يا ملح ديما..الله يخليها لكم

N يقول...

الله بالخير:)
من قال اني مشيت مبجر؟
شفتك أصلا بس وياك اهلك فافتشلت اناديك مادري ليش؟ لول
الله يخلي الصغيره :*

ونضبطك على التوقيع.. بعد تدري عيال المنطقة العاشرة نحب نكتب على الطوفه :)))))

شقران يقول...

العزيز بوديما


لقد حضرت المناسبة الجميلة والمهمه وساكتب بعض التعقيبات على الكلمات التي قيلت

مثل كلمة السيد الصراف
والسيدة المنيس(نسيت اسمها الاول)
والسيد مظفر ممثل المنبر
وممثل للتحالف(نسيت اسمه لأن الجنبي كانوا شباب يسولفون بصوت عالي


كذلك كلمة للدكتور عبيد المطيري


اضافة الى احد ممثلي الطلبة



سأمر عليها بشكل سريع وسأحاول كتابة الموضوع هذه الليه أو غدا على أبعد تقدير إن شاء الله

--------------

ربي يخليلك ديما وتفرح فيها...بغيت اجيب راكان معاي كما وعدت العزيز كويتي لايعه كبده لكن خفت من البرد خصوصا وأن الاحتفال مقابل البحر


لكن طلعت ديما أطيب من ولدنا
:)

ربي يحفظها





مع وافر الاماني الجميلة

شقران يقول...

نسيت كلمة بوسلمى
:)


لأن موتني من الضحك على سالفة الـ

باكيج



:)

UmmEl3yal يقول...

اشلون تجي وما اشوفك؟! شكلي بزعل عليك مثل وقار وعتيج :) حسافة طافتك الديوانية :) د. عبيد المطيري أبدع!

Hamad Alderbas يقول...

يانغ

الله يسلمك ويخليلك جونيور يانغ

دامكم شفتوني ليش ما سلمتوا

بيني وبينك انا ماعندي مشكلة اعرف عن نفسي بس جذي اريح لاني كسلان اجتماعيا



زووووز

الله يسلمج ويخليج

ناطــرين تغطيتج :)



مطقوق

اجتهدنا في معركة تعديل النسخة ولله الحمد والمنة :)

فعلا اسف على التأخير بس والله ام ديما كان عندها امتحان أهو اللي اخرنا




نانو نانو

الله يعطيج العافيه على هالملخص وفعلا فاتني الكثير , والشباب اجتهدوا و ما قصروا , وانشالله تكون هذه بداية لاحتفاليات وتجمعات اكبر

بالنسبة لعبيد المطيري انا بعد ما اعرفه بس انشالله يكون له مستقبل يستاهلون شبابنا .


مع التحية

Hamad Alderbas يقول...

وقار

الله بالنــور

انا شفت عتيج هالساحر مادري شلون عرفني :)

بس التوقيع ماخذ مكانه لووول

انا وقعت من ورة وتحت كنت مجندس بس يوم خلصت ييت بقرأ شكتبت ماعرفت لوول



العزيز بو راكان

نـــاطر التغطية

مرة ثانية بسويلي شارة عشان اعرفكم :)


ديوم اليوم مادرت عن هوى دارها ماسكة لايت وتعابل فيه بحلجها :)

الله يخليلك راكان واليايات اكثر انشالله هناك فعلا الهوى ابرد من الديرة .

للاسف فاتني الكثير من التجمع لكن الظروف كانت قاهرة فعلا




العزيزة ام العيال

لا ضروري اشوفلي شارة عشان اعرفكم

شسالفة الدوانية شصااااااير حمصتوني :)

د عبيد ماعرفه بس اتشوق للاطلاع على كلمته اهوة ومطقوق



مع التحية

غير معرف يقول...

يعطيكم العافيه جميعا على حضوركم الطيب و اللي يفرح القلب

و خاصة عندما توقفت عند أخوي حمد و سلمت عليه و تعرفت إليه صاحب الإبتسامة البشوشة و المتفائلة و خاصة مع الأهل و البنية الحلوة ديما "تتربى بعزك" يا صديقي.

اهم شي شخبطتنا على طوفة الدروازة أنا و صديقي وقار بالغصب لقينا مكان و مساحة نترك بها ذكرى متواضعه.

أكثر شئ أسعدني هو عندما تجمعنا أنا و عدد لا بأس به من البلوقرز اللي أستطيع أسميهم الشجعان وراء الكواليس :)

و عسى تدوم الجمعه الحلوة في مثل هذه المناسبات الجميلة..و خاصة عندما إستمتعنا بخطاب أ.أحمد الصراف و قصائد الشاعر الواعد العندليب.

----

أم العيال..شسالفة مالنا بالطيب نصيب إلى الآن مو قادر أشوفج و ألقي عليج التحية و اليايات أكثر :)

Hamad Alderbas يقول...

عتيج العزيز

الله يعطيكم العافية والله وعساكم على القوة , وبصراحة سعدت يوم شفت توقيعكم واهوة توقيعنا كلنا لان عشرة سنين بينا في المدونات والمنتديات

وسعدت اكثر بلقاءك والتعرف عليك لكن يا الساحر شلون عرفتني ؟ :)

تحياتي لك اخي العزيز

Yin مدام يقول...

حمد

أنا شفت ديما الله يحفظها بس ما كنت أعرفها لوول
تعرفت عليها من صورتها اللي أنت حاطها بالبوست :)

ما لحقنا على كلمة مطقوق .. كنا بعاد والصوت كلش مو واضح مع سوالف الناس وصراخ اليهال.
وعيالناويانا كانوا لاهين برسم الوجوه وطبع كف اليد على اللوحة وترك توقيع تذكاري :)

بس شفنا د. الخطيب وصورنا وياه
وحضرنا ورشة الدستور واستمتعنا بابداع حسين العندليب :))
تحسفت ما سجلت إلقاءه :(
وصورنا العرضة وتوكلنا على الله :)
كان يوم ممتع واليهال وايد استانسوا وصاروا يسألونا عن الدستور وكل واحد أخذ له نسخة حتى بو سنتين لووول وقعدوا يتصفحونه :)

ما تعرفت على ولا بلوقر عدا زوز :))

enter-q8 يقول...

بو ديمه انا ما قهرني الا

اللي كاتب اسمه مال قضية البدون
لو الدستور مطبق لما كان هناك بدون
يوم حطيت و تبقى الكويت و انا اطالعه
يقول حق صاحبة تبينا نتهاوش
كنت اتوقع ان الحدث اقوى بوايد خصوصا انه يوم الدستور
استضافة ناس من اعضاء المجلس التأسيسي رجالات الكويت توزيع الدستور عند الاشارة مو بس على الحضور

لكن اتمنى انها بداية الى الافضل

شقران لا تحش فينا

haifa يقول...

حسافة ماحضرت
طلعت من دوامي امس الساعة 5 ادعم الطوف .. كان بخاطري اشوف الجميع

حمد بنتك لها مستقبل كيووووت
عسى جدام بيتكم ارتداد يشيل طوابير الخطاب

غير معرف يقول...

كان يوم جميل في جو جميل و جهود جميلة كذلك

وقار شخبط على كيف كيفك و اذا تبي ابنيلك طوفه كاملة بساحة الارادة ترسم و تشخبط عليها و بس حقك p;

N يقول...

إلا صج..
انت مغيّر رقمك؟ لأن امس دقيت عليك ومارديت علي

هذيان يقول...

الله يحفظها لك يا حمد

بسم الله عليها

اتزوجها !!!


حمد لفته جميلة منك وجود ابنتك معك بهذا اليوم يحسسنا ان الدستور بالنسبة لك لا يتجزأ ولا يكون التغني به بنظرة عوراء كما هو الدارج الآن

Mozart يقول...

يحليلها بنتك :) ميخالف ان تصل متأخرا خير من أن لا تصل

Hamad Alderbas يقول...

العزيزة يين

( من مساع احاول اعلق عندكم ماقدر وللحين ناطر )

مشكورييين على التغطية والله يخليلكم العنونات الصغار وبصراحة فرحت يوم عرفت منكم عن الفعاليات الخاصة بالاطفال انا اتوقع ان استمرت هالاحتفالية راح يحبونها اليهال ويتعلقون فيها مثل ما تعلقنا احنا بالعيد الوطني

وبلغي تشكراتي لفنان التصوير يانغ الثاني :)

----


عزيزي انتر

مو قلنالكم خل تنحل القضية دوليا بس محد راضي يسمع , الكل راح يرتاح في حال لو حلت القضية بشكل شفاف وعادل ومحايد وموثوووووق

بالنسبة للاحتفالية فقد تابعت تعليقاتك عند الزملاء والموضوع اللي كاتبه , طبعا هو رأيك ولكن لا تنسى اخي الكريم قبل الانتقاد السؤال عن مصادر الاموال اللي اعتمدوا عليها الشباب ان كانت من مالهم الخاص او في دعم والواضح ان ماكان في دعم حتى انهم ما قدروا ينزلون اعلانات بالصحف , لاتنسى بعد انهم بالتأكيد عندهم دراستهم ومشاغلهم وبصراحة برافو عليهم وبيضوها وعفية عليهم وانا عن نفسي اشوفهم احسن مني بوايد اللي لهيت بمشاغلي وقعدت بالبيت في وقت فراغي .

وانا متأكد من انها بتكون البداية والياي افضل اكيد .

---------


عزيزتي هيفاء

بصراحة كان يوم يستاهل والجو عالبحر كان روعة ويطير التعب , حسافة وصلت متأخر لولا الظروف وانشالله باليايات بتكونين موجودة .

ديوم راسم لها خطة بس مادري راح تعجبها وتمشي عليها او لا راح اقولها بتعليقي على الزميلة هذيان


-----

عزيزتي فاطمة السالم

كان يوم اكثر من رائع مع اني ما لحقت الا على الاخير .

اما وقار وعتيج فأهمه حبايب التدوين والمنتديات من زمــان :)

----------

عزيزي وقــار

مادري يمكن مشكلة اضافة الرقم , انا رقمك مو عندي لان من نص حرف الميم ونازل كلهم ضاعوا وضيعوني معاهم

ادزه لك ايميل

----------


عزيزتي هذيان

الله يسلمج ويخليج

الدستور حياتنا - هذا اللي كتبته على اللوحة , لانه فعلا حياتنا .

بالنسبة لديوم اتفقنا ان احنا نحاول نعدها لان تكون طبيبة وتروح تتطوع في افريقيا .

اذا في ريل يدعمها على ايدج لوول :)

--------

عزيزي موزارت

اشوة لحقت جان الحين قاعد اكل بروحي لوول


تحياتي لكم جمــــيعا

وسيشهد يقول...

حضوركم شرفنا و سامحونا عالقصور و صراحة المشاكل اللي صارت أغلبها فنية و راح نتداركها بالأنشطة الياية و خصوصا "الصوت و الإضاءه" و اعذرونا على التنظيم شوي لأنه الغالبية متطوعين و خبرتهم بالعمل ضعيفه بس إن شاء الله يكونون اكتسبوا خبرة و تعلموا من الهفوات اللي صارت و بخصوص الدعاية و الاعلان عن النشاط للأسف الكل كان رافض يحط الاعلانات ملوتنا لأنه حسب كلامهم إنها شغله سياسية و خايفين يعطونا تصريح فيها بس حضوركم كان وسام على صدورنا و بالنسبة للوقت احنا حاولنا نحط اقرب وقت يناسب الناس لأنه يوم الثلاثاء يعني دوام و قدرنا طلعت الناس من دواماتهم و يريحون شوي و يردون و خفنا انه البرنامج يتأخر و خصوصا انه الناس ما يقدرون يتأخرون بس إن شاء الله راح نقدر نعدل هالشغلات بالانشطة القادمة

Hamad Alderbas يقول...

عزيزي الصقر

ما اقول الا الله يعطيكم العافية ومجهود وعمل تشكرون عليه

فعلا فعلا مشكورين

وناطرينكم باليايات


تحياتي لك وللمجموعة الطيبة